یومِ تکبیر: مسلح افواج کا وطن کے دفاع کیلئے ہر قربانی دینے کے عزم کا اعادہ

اسلام آباد(پاکستانی نیوزڈیسک)یومِ تکبیر کے 28ویں موقع پر پاکستان کی مسلح افواج نے پوری قوم کو مبارکباد پیش کرتے ہوئے ملک کی خودمختاری، سلامتی اور علاقائی سالمیت کے دفاع کیلئے ہر قربانی دینے کے عزم کا اعادہ کیا ہے۔

پاک فوج کے شعبۂ تعلقاتِ عامہ (آئی ایس پی آر) کے مطابق فیلڈ مارشل عاصم منیر، چیف آف دی نیول اسٹاف ایڈمرل نوید اشرف اور چیف آف دی ائیر اسٹاف ائیر چیف مارشل ظہیر احمد بابر سدھو نے یومِ تکبیر کے موقع پر قوم کیلئے مشترکہ پیغام جاری کیا۔

عسکری قیادت نے اپنے پیغام میں کہا کہ 28 مئی 1998 پاکستان کی تاریخ کا ناقابلِ فراموش دن ہے، جب پاکستان نے ایٹمی قوت بن کر جنوبی ایشیا میں طاقت کا توازن بحال کیا اور دنیا پر واضح کر دیا کہ پاکستانی قوم اپنے دفاع پر کبھی سمجھوتہ نہیں کرے گی۔

بیان میں کہا گیا کہ یومِ تکبیر قومی اتحاد، استقامت اور مادرِ وطن کے دفاع کیلئے غیر متزلزل عزم کی علامت ہے۔ یہ تاریخی کامیابی ملک کی دوراندیش قیادت، سائنسدانوں، انجینئرز، مسلح افواج اور پوری قوم کی مشترکہ قربانیوں اور انتھک محنت کا نتیجہ ہے۔

مسلح افواج نے اس بات پر زور دیا کہ پاکستان کی جوہری صلاحیت ایک مقدس قومی امانت ہے، جو خطے میں امن، استحکام اور مؤثر دفاعی حکمتِ عملی کی ضمانت سمجھی جاتی ہے۔

عسکری قیادت نے مزید کہا کہ پاکستان کی مسلح افواج ہر قسم کے خطرات کے خلاف مادرِ وطن کے دفاع کیلئے مکمل طور پر تیار ہیں اور ملک کے امن، سلامتی اور خوشحالی کیلئے اپنی ذمہ داریاں پوری کرتی رہیں گی۔

یومِ تکبیر کے موقع پر قوم نے بھی اتحاد، بیداری، استقامت اور ترقی یافتہ پاکستان کے عزم کی تجدید کرتے ہوئے ملکی سلامتی اور استحکام کیلئے بھرپور یکجہتی کا اظہار کیا۔