افغانستان کے صوبہ نورستان میں تباہ کن سیلاب، 20 افراد جاں بحق، 80 سے زائد زخمی، 100 سے زیادہ لاپتا

اسلام آباد(پاکستانی نیوزڈیسک)افغانستان کے شمال مشرقی صوبے نورستان میں شدید بارشوں کے بعد آنے والے تباہ کن سیلاب نے بڑے پیمانے پر جانی و مالی نقصان پہنچایا ہے۔ حکام کے مطابق مختلف حادثات میں کم از کم 20 افراد جاں بحق، 80 سے زائد زخمی جبکہ 100 سے زیادہ افراد لاپتا ہیں۔

افغان حکام کے مطابق پیر کے روز آنے والے اچانک سیلاب نے صوبائی دارالحکومت پارون اور اس کے نواحی علاقوں کو بری طرح متاثر کیا۔ سیلابی ریلوں نے مکانات، دکانیں، ہوٹل اور دیگر املاک کو بہا دیا، جبکہ دریا کے کنارے قائم بازار مکمل طور پر تباہ ہو گئے۔

افغانستان کی قومی ڈیزاسٹر مینجمنٹ اتھارٹی کے مطابق متاثرہ علاقوں میں سرچ اینڈ ریسکیو آپریشن جاری ہے۔ اب تک 20 افراد کی لاشیں نکالی جا چکی ہیں جبکہ زخمیوں کو قریبی اسپتالوں میں منتقل کیا گیا ہے۔

حکام کا کہنا ہے کہ سیلاب سے متعدد ہوٹل، درجنوں دکانیں، سڑکیں اور بنیادی ڈھانچہ شدید متاثر ہوا ہے، جس کے باعث کئی علاقوں کا زمینی رابطہ منقطع ہو گیا ہے۔

افغان ڈیزاسٹر ایجنسی نے آئندہ دنوں میں مزید بارشوں اور طوفانوں کی پیش گوئی کرتے ہوئے شہریوں کو دریاؤں، ندی نالوں اور سیلابی علاقوں سے دور رہنے اور مقامی انتظامیہ کی ہدایات پر عمل کرنے کی ہدایت کی ہے۔

نورستان پاکستان سے ملحق ایک پہاڑی صوبہ ہے، جہاں مون سون کے موسم میں اچانک سیلاب اور لینڈ سلائیڈنگ کے واقعات معمول کا حصہ ہیں، تاہم ماہرین کے مطابق حالیہ سیلاب حالیہ برسوں کے بدترین قدرتی سانحات میں شمار کیا جا رہا ہے۔