فیفا ورلڈ کپ کا فائنل آج، میسی اور یامال کی ٹکر پر دنیا بھر کی نظریں

اسلام آباد(پاکستانی نیوزڈیسک)نیویارک: فیفا ورلڈ کپ کا فائنل آج نیو جرسی اسٹیڈیم میں ارجنٹائن اور اسپین کے درمیان کھیلا جائے گا، جہاں شائقین کی توجہ 39 سالہ لیونل میسی اور 19 سالہ لامین یامال کے درمیان متوقع دلچسپ مقابلے پر مرکوز ہے۔

فیفا کی ٹورنامنٹ سے قبل جاری عالمی رینکنگ کے مطابق ارجنٹائن نمبر ایک جبکہ اسپین نمبر دو ٹیم ہے۔ ماہرین کے مطابق موجودہ فارم کے باعث اسپین کو مضبوط حریف تصور کیا جا رہا ہے، جبکہ ارجنٹائن کے لیے فائنل آسان نہیں ہوگا۔

ارجنٹائن نے سیمی فائنل میں انگلینڈ کو شکست دے کر فائنل میں جگہ بنائی، تاہم تجزیہ کاروں کے مطابق انگلینڈ کی دفاعی حکمت عملی نے آخری لمحات میں ارجنٹائن کو زیادہ مواقع فراہم کیے۔ دوسری جانب اسپین پورے ٹورنامنٹ میں متوازن دفاع، گیند پر کنٹرول اور بھرپور فٹنس کے باعث نمایاں رہا ہے۔

اعداد و شمار کے مطابق ورلڈ کپ کی تاریخ میں پہلی بار موجودہ یورپی چیمپئن اسپین اور موجودہ جنوبی امریکی چیمپئن ارجنٹائن فائنل میں آمنے سامنے ہوں گے۔ اسی طرح پہلی مرتبہ فیفا رینکنگ کی نمبر ایک اور نمبر دو ٹیمیں ورلڈ کپ کے فائنل میں مدمقابل ہیں۔

دونوں ٹیمیں اس سے قبل ورلڈ کپ میں صرف ایک بار 1966ء میں آمنے سامنے آئی تھیں، جہاں ارجنٹائن نے 1-2 سے کامیابی حاصل کی تھی۔ حالیہ ریکارڈ میں اسپین نے دونوں ٹیموں کے درمیان کھیلے گئے گزشتہ چھ مقابلوں میں سے چار میں کامیابی حاصل کی، جبکہ ارجنٹائن کی آخری فتح 2010 میں آئی تھی۔

اسپین اگر ٹائٹل اپنے نام کرتا ہے تو وہ بیک وقت مردوں اور خواتین کا عالمی چیمپئن بننے والی پہلی ٹیم بن جائے گی۔ دوسری جانب ارجنٹائن کی کامیابی کی صورت میں وہ مسلسل چار بڑے بین الاقوامی ٹائٹلز جیتنے والی تاریخ کی پہلی قومی ٹیم بن جائے گی، جس میں 2021 اور 2024 کے کوپا امریکا اور 2022 کا ورلڈ کپ پہلے ہی شامل ہیں۔