عالمی منڈی میں تیل ک

اسلام آباد(پاکستانی نیوزڈیسک)عالمی منڈی میں ایران اور امریکا کے درمیان ممکنہ معاہدے میں تاخیر اور بڑھتی ہوئی کشیدگی کے باعث خام تیل کی قیمتوں میں مزید اضافہ ریکارڈ کیا گیا ہے۔

تازہ اعداد و شمار کے مطابق برطانوی برینٹ خام تیل کی قیمت بڑھ کر 94.29 ڈالر فی بیرل تک پہنچ گئی ہے، جبکہ امریکی خام تیل (WTI) کے نرخ بھی اضافے کے بعد 91.41 ڈالر فی بیرل ہو گئے ہیں۔

اسی طرح اماراتی خام تیل مربان کی قیمت میں بھی اضافہ دیکھا گیا ہے اور یہ 94.43 ڈالر فی بیرل کی سطح تک پہنچ گئی ہے۔

توانائی کے شعبے سے وابستہ ماہرین کا کہنا ہے کہ مشرقِ وسطیٰ میں جاری جغرافیائی و سیاسی صورتحال کے باعث آنے والے دنوں میں تیل کی قیمتوں میں مزید اتار چڑھاؤ کا امکان موجود ہے۔

ماہرین کے مطابق عالمی منڈی میں خام تیل کی قیمتوں میں اضافے کے اثرات پاکستان سمیت درآمدی ایندھن پر انحصار کرنے والے ممالک پر بھی پڑ سکتے ہیں۔ تیل مہنگا ہونے کی صورت میں ملک میں پیٹرول اور ڈیزل کی قیمتوں میں اضافے کا امکان بڑھ جاتا ہے۔

واضح رہے کہ حکومت پاکستان نے چند روز قبل پیٹرولیم مصنوعات کی قیمتوں میں کمی کا اعلان کیا تھا، تاہم عالمی منڈی میں تیل کی قیمتوں میں حالیہ اضافہ آئندہ قیمتوں کے تعین پر اثر انداز ہو سکتا ہے۔