آسٹریلوی بیٹرز کا اسپن کے خلاف کھیل تشویشناک، این ہیلی کی تنقید

اسلام آباد(پاکستانی نیوزڈیسک)سابق آسٹریلوی وکٹ کیپر بیٹر Ian Healy نے آسٹریلوی بیٹرز کی اسپن بولنگ کے خلاف کارکردگی پر سخت تنقید کرتے ہوئے ان کے کھیلنے کے انداز پر سوالات اٹھا دیے ہیں۔

این ہیلی کا کہنا ہے کہ انہیں دیگر ممالک کے بارے میں تو علم نہیں، تاہم آسٹریلوی کھلاڑیوں کے لیے 50 اوورز کی کرکٹ کھیلنا مشکل ہوتا جا رہا ہے۔ انہوں نے کہا کہ ٹیسٹ کرکٹ میں بھی ٹیم کی زیادہ تر کامیابیاں Travis Head اور Steve Smith کی کارکردگی کے گرد گھومتی ہیں۔

انہوں نے کہا کہ ون ڈے ٹیم میں کوئی بیٹر طویل وقت تک کریز پر رہ کر زیادہ گیندوں کا سامنا نہیں کرتا، جبکہ کھلاڑی بے صبری کا مظاہرہ کرتے ہوئے مسلسل باؤنڈریز لگانے کی کوشش کرتے ہیں۔

این ہیلی کے مطابق پاکستانی اسپنرز کے خلاف کامیابی کے لیے بیٹرز کو آگے بڑھ کر کھیلنا اور مثبت انداز اپنانا ضروری ہے۔ ان کا کہنا تھا کہ پاکستانی اسپنرز کے خلاف بیٹنگ کرتے وقت گیند مس ہونے کے خوف میں مبتلا نہیں ہونا چاہیے۔

سابق وکٹ کیپر نے کہا کہ وہ خود کو اس شعبے کا ماہر نہیں سمجھتے، تاہم انہوں نے آسٹریلیا کے سابق عظیم بیٹر Dean Jones کی مثال دی، جو اپنے قدموں کا مؤثر استعمال کرتے ہوئے حریف اسپنرز کا اثر کم کر دیتے تھے۔

انہوں نے مزید کہا کہ وہ خود کریز میں کھڑے ہو کر گیند کا انتظار کرتے اور سویپ یا کٹ شاٹ کھیلتے تھے، لیکن ڈین جونز اکثر گیند کی لائن میں آگے بڑھتے تھے۔ اگر انہیں وکٹ سے باہر نکلنے کا موقع نہ ملتا تو وہ لیگ سائیڈ کے خلا میں شاٹس کھیل کر دباؤ کم کر دیتے تھے۔