جسٹن گریوز کا تاریخی کارنامہ، ٹیسٹ کرکٹ میں منفرد ریکارڈ اپنے نام کر لیا

اسلام آباد(پاکستانی نیوزڈیسک)ویسٹ انڈیز کے آل راؤنڈر جسٹن گریوز نے پاکستان کے خلاف ٹراؤبا میں کھیلے جا رہے پہلے ٹیسٹ کے تیسرے روز شاندار بولنگ کا مظاہرہ کرتے ہوئے ٹیسٹ کرکٹ کا ایک منفرد ریکارڈ اپنے نام کر لیا۔

32 سالہ گریوز ریکارڈ شدہ ٹیسٹ کرکٹ کی تاریخ میں مسلسل پانچ میڈن اوورز میں وکٹیں حاصل کرنے والے پہلے بولر بن گئے۔ انہوں نے 27 رنز کے عوض پانچ کھلاڑیوں کو آؤٹ کیا، جو ان کے ٹیسٹ کیریئر میں پہلی پانچ وکٹوں کی کارکردگی بھی ہے۔

گریوز کی تباہ کن بولنگ کے باعث بظاہر مضبوط پوزیشن میں دکھائی دینے والی پاکستانی ٹیم 282 رنز پر آل آؤٹ ہوگئی اور پہلی اننگز میں 29 رنز کے خسارے سے دوچار ہوئی۔

میچ کے بعد جسٹن گریوز نے بتایا کہ کپتان روسٹن چیز نے انہیں نظم و ضبط کے ساتھ مسلسل ایک ہی لائن اور لینتھ پر بولنگ کرنے کا مشورہ دیا تھا، جس کا انہیں بھرپور فائدہ ملا۔

تیسرے روز کے اختتام پر ویسٹ انڈیز نے اپنی دوسری اننگز میں 7 وکٹوں کے نقصان پر 126 رنز بنا لیے تھے، جس کے بعد میزبان ٹیم کو مجموعی طور پر 155 رنز کی برتری حاصل ہو گئی۔