فاک لینڈز بینر پر ارجنٹینا تنازعے میں، برطانیہ کا فیفا سے کارروائی کا مطالبہ

اسلام آباد(پاکستانی نیوزڈیسک)فیفا ورلڈ کپ 2026 کے سیمی فائنل میں انگلینڈ کو 2-1 سے شکست دے کر فائنل میں پہنچنے والی ارجنٹینا کی ٹیم جشن کے دوران سیاسی بینر لہرانے پر تنازعے کا شکار ہو گئی۔

میڈیا رپورٹس کے مطابق فتح کے بعد چند ارجنٹائنی کھلاڑیوں نے "مالویناس ارجنٹینا کے ہیں” لکھا بینر اٹھایا، جس پر برطانیہ نے شدید اعتراض کرتے ہوئے فیفا سے کارروائی کا مطالبہ کر دیا۔

برطانوی وزیر تجارت و کاروبار پیٹر کائل نے کہا کہ فیفا کے قوانین کے تحت کھیل کے میدان میں سیاسی نوعیت کے بینرز، نعرے اور علامات کی اجازت نہیں، اس لیے اس واقعے کی مکمل تحقیقات ہونی چاہییں اور خلاف ورزی ثابت ہونے پر مناسب تادیبی کارروائی کی جانی چاہیے۔

برطانوی وزیراعظم کیئر اسٹارمر کے دفتر نے بھی اپنے بیان میں کہا کہ کھیل کو سیاسی پیغامات کے لیے استعمال نہیں کیا جانا چاہیے اور فاک لینڈز برطانیہ کا خودمختار علاقہ ہیں۔

فیفا کے ضابطۂ اخلاق کے مطابق اسٹیڈیم میں سیاسی یا نظریاتی نوعیت کے پیغامات ممنوع ہیں۔ اگر قوانین کی خلاف ورزی ثابت ہوئی تو ارجنٹینا کی ٹیم یا اس کی فٹبال فیڈریشن کو جرمانے یا دیگر تادیبی اقدامات کا سامنا کرنا پڑ سکتا ہے۔

دوسری جانب ارجنٹینا میں اس بینر کی حمایت بھی سامنے آئی ہے۔ ارجنٹائنی قیادت نے اسے ملک کے دیرینہ مؤقف کا اظہار قرار دیا، تاہم اس بات کا اعتراف بھی کیا کہ فیفا اس معاملے پر کارروائی کر سکتا ہے۔

واضح رہے کہ فاک لینڈز (مالویناس) جنوبی بحرِ اوقیانوس میں واقع برطانوی زیرِ انتظام جزائر ہیں، جن پر ارجنٹینا بھی خودمختاری کا دعویٰ کرتا ہے۔ 1982 کی جنگ کے بعد سے یہ معاملہ دونوں ممالک کے درمیان ایک حساس تنازع بنا ہوا ہے۔