ڈومیسٹک کرکٹ سے دوری پر بڑے کھلاڑیوں کے معاہدے خطرے میں، نیا نظام متعارف

اسلام آباد(پاکستانی نیوزڈیسک)پاکستان کرکٹ بورڈ نے واضح کر دیا ہے کہ ڈومیسٹک فرسٹ کلاس کرکٹ میں عدم شرکت کرنے والے کھلاڑیوں کے مرکزی معاہدے عارضی طور پر روک دیے جائیں گے اور شرط پوری ہونے تک انہیں معاوضہ بھی نہیں ملے گا۔

ڈائریکٹر اعلیٰ کارکردگی عاقب جاوید کے مطابق کھلاڑیوں کے لیے فرسٹ کلاس کرکٹ کھیلنا پہلے بھی لازمی تھا، تاہم اس پر مکمل عملدرآمد نہیں ہو سکا۔ انہوں نے کہا کہ اب نظام کو مضبوط بنانے کے لیے تمام کھلاڑیوں کو ڈومیسٹک کرکٹ میں شرکت یقینی بنانا ہوگی۔

عاقب جاوید نے کہا کہ کسی کھلاڑی کو صرف شہرت یا سنیارٹی کی بنیاد پر معاہدہ نہیں دیا جائے گا بلکہ انتخاب کارکردگی، اثر پذیری اور جسمانی فٹنس کو مدنظر رکھ کر کیا جائے گا۔

انہوں نے بتایا کہ اعلیٰ درجے کے ٹیسٹ کھلاڑیوں کو کم از کم چھ فرسٹ کلاس میچز کھیلنا ہوں گے، جبکہ دیگر درجہ بندیوں میں شامل کھلاڑیوں کے لیے بھی فرسٹ کلاس، ایک روزہ اور ٹی ٹوئنٹی ڈومیسٹک میچز کی مخصوص تعداد لازمی قرار دی گئی ہے۔

عاقب جاوید کے مطابق ڈومیسٹک کرکٹ میں شرکت کرنے والے کھلاڑیوں کو بین الاقوامی میچ فیس کا نصف معاوضہ دیا جائے گا، جبکہ بعض درجوں کے کھلاڑیوں کے لیے غیر ملکی لیگز کھیلنے پر بھی پابندیاں عائد کی جائیں گی۔

یاد رہے کہ قومی ٹیم کے کئی نمایاں کھلاڑی، جن میں بابر اعظم اور شاہین شاہ آفریدی بھی شامل ہیں، اس وقت لازمی فرسٹ کلاس میچز کی شرط پوری نہیں کرتے، جس کے باعث ان کے معاہدوں کے بارے میں بھی سوالات اٹھ رہے ہیں۔