پاکستان نے ایران معاہدے میں اہم کردار ادا کیا، فیلڈ مارشل عاصم منیر اور وزیراعظم شہباز شریف کی تعریف: ڈونلڈ ٹرمپ

اسلام آباد(پاکستانی نیوزڈیسک)امریکی صدر ڈونلڈ ٹرمپ نے کہا ہے کہ پاکستان نے ایران کے ساتھ معاہدے میں اہم کردار ادا کیا ہے، اور اس عمل میں پاکستانی قیادت کا تعاون قابلِ تعریف ہے۔

امریکی ویب سائٹ کو دیے گئے انٹرویو میں صدر ٹرمپ نے کہا کہ پاکستان کے وزیراعظم شہباز شریف اور فیلڈ مارشل عاصم منیر عظیم انسان ہیں اور دونوں کے درمیان بہترین ہم آہنگی پائی جاتی ہے۔ ان کے مطابق فیلڈ مارشل اپنے وزیراعظم کا بھرپور احترام کرتے ہیں۔

ٹرمپ نے مزید کہا کہ پاکستان ایرانی قیادت اور خطے کی صورتحال کو بہتر طور پر سمجھتا ہے، اسی وجہ سے ایران کے ساتھ امن مذاکرات میں اس نے مثبت کردار ادا کیا۔

انہوں نے ایران کے سابق جوہری معاہدے کا ذکر کرتے ہوئے کہا کہ 2015 کا معاہدہ ناکام ثابت ہوا، جبکہ موجودہ کوششیں زیادہ مؤثر ثابت ہو رہی ہیں۔

امریکی صدر نے چین کے کردار پر بات کرتے ہوئے کہا کہ بیجنگ کو ایران تنازع سے دور رہنے کا مشورہ دیا گیا، اور چین نے اس پر عمل کرتے ہوئے مداخلت سے گریز کیا۔

انہوں نے یہ بھی بتایا کہ وہ آئندہ دنوں میں ترکی کا دورہ کریں گے جبکہ 2026 میں چین کا دورہ بھی متوقع ہے۔

صدر ٹرمپ کے مطابق حالیہ اقدامات کے نتیجے میں عالمی توانائی صورتحال بہتر ہوئی ہے اور تیل کی قیمتوں میں مزید کمی کی توقع ہے۔

دوسری جانب مختلف رپورٹس کے مطابق ایران، امریکا اور پاکستان کے درمیان ہونے والے معاہدے کے بعد خطے میں کشیدگی میں کمی اور توانائی ترسیل کے راستوں میں بہتری آئی ہے۔