شادی میں جاؤں یا نہ جاؤں، میڈیا تنقید ہی کرے گا: امریکی صدر ڈونلڈ ٹرمپ کا گلہ

اسلام آباد(پاکستانی نیوزڈیسک)امریکی صدر ڈونلڈ ٹرمپ نے کہا ہے کہ وہ رواں ہفتے کے اختتام پر اپنے بڑے بیٹے ڈونلڈ ٹرمپ جونیئر کی شادی میں شرکت کی کوشش کریں گے، تاہم ایران جنگ کی سنگین صورتِ حال اور دیگر قومی معاملات کے باعث یہ وقت ان کے لیے مناسب نہیں ہے۔

امریکی میڈیا رپورٹس کے مطابق، ٹرمپ آرگنائزیشن کے 48 سالہ ایگزیکٹیو نائب صدر ڈونلڈ ٹرمپ جونیئر رواں ویک اینڈ پر بہاماس میں بیٹینا اینڈرسن کے ساتھ ایک نجی تقریب میں اپنی دوسری شادی کرنے جا رہے ہیں۔

گزشتہ روز اوول آفس میں صحافیوں سے گفتگو کرتے ہوئے امریکی صدر نے بتایا کہ ان کے بیٹے کی شدید خواہش ہے کہ وہ اس تقریب کا حصہ بنیں، لیکن اس وقت ایران کا معاملہ اور دیگر ریاستی امور ان کی اولین ترجیح ہیں۔ انہوں نے کہا، "میں شرکت کی پوری کوشش کروں گا، یہ ایک چھوٹی اور نجی تقریب ہوگی، لیکن ایران کی موجودہ صورتِ حال کے باعث یہ میرے لیے موزوں وقت نہیں ہے۔”

صدر ٹرمپ نے میڈیا کے رویے پر گفتگو کرتے ہوئے کہا کہ اگر وہ بیٹے کی شادی میں شرکت کے لیے جاتے ہیں تب بھی میڈیا ان پر تنقید کرے گا، اور اگر وہ نہیں جاتے تو تب بھی ان کو تنقید کا نشانہ بنایا جائے گا۔ انہوں نے نئے جوڑے کے لیے نیک خواہشات کا اظہار کرتے ہوئے امید ظاہر کی کہ دونوں کی ازدواجی زندگی خوش گوار رہے گی۔

واضح رہے کہ ڈونلڈ ٹرمپ جونیئر اپنے والد کے ’میگا‘ (MAGA) سیاسی ایجنڈے کے سرگرم حامی ہیں اور اکثر مختلف سیاسی و عوامی تقریبات میں صدر ٹرمپ کے ہمراہ نظر آتے ہیں۔ گزشتہ سال انہوں نے مستقبل میں صدارتی انتخاب لڑنے کی خواہش کا اظہار بھی کیا تھا، جبکہ ان کے والد ڈونلڈ ٹرمپ کی دوسری اور آخری صدارتی مدت جنوری 2029ء تک جاری رہے گی۔