کمر کی انجری کے باعث عبداللہ فضل ویسٹ انڈیز اور انگلینڈ کے خلاف ٹیسٹ سیریز سے باہر

اسلام آباد(پاکستانی نیوزڈیسک)پاکستانی ٹیسٹ ٹیم کے ابھرتے ہوئے اوپنر عبداللہ فضل کمر کے نچلے حصے میں انجری کے باعث ویسٹ انڈیز اور انگلینڈ کے خلاف آئندہ ٹیسٹ سیریز سے باہر ہو گئے ہیں۔

پاکستان کرکٹ بورڈ (پی سی بی) کے مطابق انجری جمعرات کو ٹرینیڈاڈ میں برائن لارا کرکٹ اکیڈمی میں ٹریننگ سیشن کے دوران پیش آئی، جہاں ویسٹ انڈیز کے خلاف پہلا ٹیسٹ میچ کھیلا جانا ہے۔

پی سی بی کا کہنا ہے کہ ایم آر آئی اسکین اور طبی معائنے کے بعد ٹیم کے میڈیکل پینل نے عبداللہ فضل کو بحالی کے عمل سے گزرنے کا مشورہ دیا ہے، جبکہ ان کے متبادل کھلاڑی کے حوالے سے تاحال کوئی فیصلہ نہیں کیا گیا۔

23 سالہ عبداللہ فضل نے مئی میں بنگلادیش کے خلاف ٹیسٹ ڈیبیو کیا تھا اور اپنے پہلے ہی میچ کی دونوں اننگز میں نصف سنچریاں اسکور کرکے متاثر کن آغاز کیا تھا۔ ویسٹ انڈیز سلیکٹ الیون کے خلاف وارم اپ میچ میں بھی وہ دونوں اننگز میں ناٹ آؤٹ رہے اور بالترتیب 50 اور 48 رنز بنائے تھے۔

ان کی عدم موجودگی میں مڈل آرڈر بیٹر اویس ظفر کے ٹیسٹ ڈیبیو کے امکانات روشن ہو گئے ہیں، جبکہ امام الحق کے دوبارہ اوپننگ جوڑی کا حصہ بننے کی توقع کی جا رہی ہے۔

قومی ٹیم کے کپتان بابر اعظم نے عبداللہ فضل کی جلد صحت یابی کے لیے نیک تمناؤں کا اظہار کرتے ہوئے کہا کہ وہ ایک باصلاحیت اور پراعتماد نوجوان کھلاڑی ہیں، جن کی غیر موجودگی ٹیم کے لیے بڑا نقصان ہے۔