عمران ہاشمی سے موازنہ غیر منطقی تھا، آئندہ ایسے مناظر میں زیادہ محتاط رہوں گی: سحر ہاشمی

اسلام آباد(پاکستانی نیوزڈیسک)پاکستان کی اُبھرتی ہوئی اداکارہ اور سوشل میڈیا انفلوئنسر سحر ہاشمی نے بھارتی اداکار عمران ہاشمی سے کیے جانے والے موازنے پر پہلی بار کھل کر اظہارِ خیال کرتے ہوئے کہا ہے کہ یہ موازنہ انہیں غیر منطقی اور افسوسناک محسوس ہوا۔

سحر ہاشمی نے کہا کہ اگرچہ تنقید نے انہیں بطور اداکار بہتر بننے میں مدد دی، تاہم بعض تبصرے، خصوصاً عمران ہاشمی سے تشبیہ دینا، بے بنیاد تھا۔

اداکارہ نے بتایا کہ انہوں نے اپنے ڈراموں "زنجیریں” اور "شیدائی” میں صرف وہی مناظر کیے جو اسکرپٹ کا حصہ تھے اور جنہیں ہدایت کار اپنے تخلیقی وژن کے مطابق پیش کرنا چاہتے تھے۔ ان کا کہنا تھا کہ ہر فنکار اپنے کردار اور کہانی کی ضرورت کے مطابق کام کرتا ہے، اور اسکرین پر گلے ملنے کے مناظر کو غیر معمولی انداز میں پیش کرنا مناسب نہیں۔

سحر ہاشمی نے کہا کہ ان کے ہدایت کار نے انہیں مکمل اعتماد دیا تھا کہ اگر وہ خود کو ان مناظر کے لیے مطمئن محسوس کرتی ہیں تو انہیں ضرور کریں۔

اس سوال پر کہ زیادہ تر تنقید کا سامنا صرف انہیں کیوں کرنا پڑا، جبکہ مرد اداکار نسبتاً کم تنقید کی زد میں آئے، سحر ہاشمی نے مسکراتے ہوئے کہا کہ شاید اس کی وجہ عمران ہاشمی سے کیا جانے والا موازنہ تھا۔ تاہم انہوں نے اعتراف کیا کہ اس تنازع نے انہیں مستقبل میں ایسے مناظر کے انتخاب کے حوالے سے زیادہ محتاط رہنے پر مجبور کیا ہے۔

انہوں نے کہا کہ اگر ناظرین کو ایسے مناظر پسند نہیں تو وہ آئندہ اس معاملے میں احتیاط برتیں گی، تاہم لوگوں سے اپیل کی کہ تنقید ضرور کریں، مگر انہیں سخت اور غیر ضروری نشانہ نہ بنایا جائے۔

آن لائن نفرت انگیز تبصروں کے اثرات پر بات کرتے ہوئے سحر ہاشمی نے کہا کہ بعض اوقات لوگ دوسروں کی کامیابی میں بھی خامیاں تلاش کرتے ہیں، جو تکلیف دہ ہوتا ہے۔ انہوں نے انکشاف کیا کہ ایک وقت ایسا بھی آیا جب وہ راتوں کو روتے ہوئے سو جاتی تھیں، تاہم مشکل دور میں ساتھی فنکاروں اور دوستوں نے ان کا بھرپور ساتھ دیا۔